祖記殘陣唔慌多攻「細」

猪拉多纳

今晚意甲早場由基爾禾迎戰「一哥」祖雲達斯，「斑馬兵團」喺上輪摸和熱拿亞場波賽後因為「圍球證」理論，導致將帥合共4人被罰停賽，加上佢哋喺歇冬後嘅表現跌晒Watt，今晚造訪出名主場防守硬淨嘅基爾禾，相信會陷於苦戰，吼1.75倍「入球細」有着數。（開賽時間：周日晚7:30）

祖雲達斯自歇冬後好似未瞓醒咁，意甲連盃賽踢咗7場只錄得1勝4和2負，當中6場仲只能夠攻入對手1球，同季初大殺四方嘅狀態相差好遠。更麻煩嘅係主帥干地、前鋒胡仙歷、守將邦路斯同基亞連尼因為上輪聯賽「圍球證」一事，今仗齊齊坐波監，而且中場馬治斯奧、柏比同仲打緊非國盃嘅卡華禾艾沙姆繼續缺陣，數胡能力進一步下降。雖然法國前鋒安歷卡落實加盟，但對一個休咗兩、三個月嘅球員嚟講，狀態弗極有限，都係咪對佢抱住太大期望好啲！
基爾禾守強攻弱

另邊廂嘅「飛驢」基爾禾，近4次主場聯賽雖只曾攻破對手大門3次，但亦只失1球咁大把，盡顯佢哋守強攻弱嘅一面，最慘係今場仲有一對箭頭柏利斯亞同沙馬沙唔踢得，睇怕基爾禾會繼續打佢哋至拿手嘅防守足球力保1分。再睇埋對賽記錄，雙方近6次碰面5度開細，有埋數據支持更值信賴。