AC烏甸演入球騷

猪拉多纳

巴洛迪利引爆射手良性競爭

「巴神」一出，誰與爭鋒？新加盟AC米蘭嘅巴洛迪利係咪咁堅，力奇唔敢講，但唯一可以肯定，係當「腦殘」嚟到聖西路將會引發一場正選前鋒位置爭奪戰，包括艾沙拉維、柏仙尼、麥巴耶尼安等個個都要為保正選而戰，全力爭取入波顯身價，今晚佢哋喺意甲尾場主場迎戰烏甸尼斯，撞正客隊雙箭頭又係着晒火，1.78倍「入球大」穩陣啦！（開賽時間：周一凌晨3:45）

巴洛迪利嘅入球天分毋庸置疑，雖則話佢上半季喺曼城發揮麻麻，但嚟到意甲，試問又有邊個敢睇死佢唔可以大爆發？唔係講笑，前日當佢正式加盟報到，隔咗幾粒鐘落場踢熱身賽，對住隊低組別球隊，戰果贏10:0唔係重點，重點係「巴神」入咗1球，再加2次助攻畀艾沙拉維，呢對「雞冠」雙箭頭合作嘅化學作用認真得人驚。
烏甸「老嫩孖寶」同樣着火

再者，就算巴洛迪利今晚可能先任後備，但其實艾沙拉維同柏仙尼兩個今季都夾埋入咗25球，火力本來都相當驚人，要知道力奇仲未數到羅賓奴、保贊、麥巴耶尼安同奇雲保定呢幾個「士哥」高手，睇怕主帥阿里基無論派邊個上陣，都肯定入球不絕啦！何況近9場聯賽贏咗7場嘅佢哋，亦要搶分為踢下屆歐聯而戰，仲邊有可能留手？

烏甸呢邊，狀態其實同樣唔曳，近4戰贏3場，最值得注意係佢哋對「老嫩孖寶」迪拿達利同路爾斯梅利爾，近5戰就各自入咗4粒，同樣都係着晒火，比起AC條鑽石鋒線都唔算失禮。再考慮埋AC近4場主場戰係全部開大，烏甸近3次到臨聖西路又有2次開大，今鋪追大應該冇衰。