多蒙特士氣高「遜」得過

猪拉多纳

教頭重情拒過兵工廠

現代足球世界利字當頭，不過都有人嫌錢腥。最近多蒙特教頭高普公開請阿仙奴食檸檬，話寧願留喺德甲同拜仁鍊過，球員聽到肯定為佢賣命！利華古遜今晚喺德甲主場迎戰多蒙特，受讓平半都咪捧！（有線61、64、201、204及中央5台周一凌晨0:30直播）
要做德甲莫連奴撼哥帥

雖然有消息話，阿仙奴想搵高普代替雲格領軍，重新打造兵工廠，但有機會狂加人工嘅高普竟然不為所動，仲話暫時無計劃離開德甲，而且打算喺下季同哥迪奧拿帶領嘅拜仁撼過，仲話希望自己做到德甲版莫連奴，粉碎哥迪奧拿橫掃錦標嘅美夢！除咗高普重情義，32歲兼周身傷嘅隊長基爾都獲挽留，難怪馬里奧葛斯話願意成世踢多蒙特。

除此之外，多蒙特肯使錢向利物浦回購中場紐尼沙軒，都係佢哋獲得球員同球迷擁戴嘅原因，即使中堅蘇保迪同後衞奧禾莫耶拉需要養傷，都唔需要太擔心，始終多蒙特踏入2013年後連續兩場大勝，士氣冇得頂。講埋利華古遜，上星期作客以0:0打和弗賴堡，主要因為有兩次埋門欠運中柱，弊在希比亞接手執教後，今季利華古遜曾經作客淨吞多蒙特3蛋，今日落到場球員心理上輸晒，受讓都唔似撐得過！