迪基亞神救拍爛手掌

猪拉多纳

上周中情人節凌晨歐聯16強首回合矚目大戰，皇馬主場1比1逼和曼聯，無論係戰術、技術、臨場變陣方面，都合演一場高水準嘅比賽。好多人批評曼聯踢得太保守，成隻縮頭烏龜咁，被皇馬攻到有氣冇碇抖，但呢個世上除咗巴塞之外，又有邊支球隊去到巴拿貝可以同皇馬鬥攻呢？老謀深算嘅曼聯領隊費格遜，點會唔明白呢個道理，況且呢次係兩回合180分鐘嘅博弈，紅魔帶住一個作客入球踢次回合，絕對係一個唔錯嘅結果。
次回合激戰可期

當中一直為人詬病嘅門神迪基亞，今仗重返老家施展渾身解數，將C朗、迪馬利亞、法比奧干查奧嘅攻門化險為夷，呢位前馬體會門將幾乎憑一己之力，協助紅魔全身而退，連曼聯名宿舒米高都激讚佢異常集中，有啲波掂到波皮都偷笑喇，迪基亞居然可以接到實一實，非常難得。Peter成日都講有一個可靠門將，能令球隊由輸變和，或由和變贏。Peter認為若非迪基亞多番作出神救，皇馬至少贏3比1，因此可以預期次回合雙方依然會鬥得難分難解，精彩可期，各位球迷有眼福喇！
金句：重返老家馬德里　門神奇勇保紅魔