利物浦大翻辛

猪拉多纳

英超海鮮兵團歐霸饗客

歐霸盃上演三十二強次回合，兩隊英超「海鮮波」利物浦及車路士回師主場出擊！紅軍於晏菲路再鬥俄超辛尼特，首回合紅軍吞兩蛋，但如非蘇亞雷斯發波瘟，上半場已入2、3粒！球隊近期主場鑊氣勁，加埋對手侯克勁入得，吼大盤！

（有線61及201台周五凌晨4時05分直播）

利物浦聯賽爭前四機會渺茫，本土兩個盃賽又出晒局，球隊得番歐霸盃有得爭，所以領隊羅渣士都一改分組賽懶懶閒作風，於首回合夫添出擊，最後輸0比2都冇計。話需說回頭，其實該仗紅軍發揮唔曳，於未失波前大把機會入波，但「哨牙蘇」腳風唔順又玩嘢，單刀又唔入，6碼又唔入，先累到紅軍處於出局邊緣。既然去到嚴寒俄羅斯都不乏機會，依家形勢上一定要入波，又返到晏菲路作賽，利物浦必谷盡十成「攻」力，以求盡快入波。

事實上，紅軍近期主場鑊氣十足，除前仗爆冷吞西布朗兩蛋外，曾大炒富咸、新特蘭、諾域治；上仗鬥半力出擊嘅史雲斯，球隊亦打出水銀瀉地攻勢。紅軍於晏菲路信心爆棚，就算今仗史杜列治及新將菲臘比古天奴都因不合上陣資格缺陣，但仲有「哨牙蘇」、謝拉特、史達寧、達寧等優質攻擊手壓陣，紅軍眾志成城，即使未能成功翻盤出線，但入波唔難。
辛尼特反擊搵到食

08年歐霸盃（當時稱歐洲足協盃）冠軍辛尼特，由意籍光頭教頭史巴列堤執教，本季於俄超表現麻麻，而且當地聯賽又正值歇冬期，球隊狀態只屬一般。以首回合所見，辛軍如非有侯克轟入世界波領先，根本冇條件贏波。但呢班波球員始終有個人質素，除侯克外，基沙哥夫、丹尼艾維斯都好射得，面對紅軍脆弱後防有機會打反擊取得士哥，呢場捧大啱數。