利華+1打劫賓菲加

猪拉多纳

歐霸盃32強次回合上演葡德對決，賓菲加主場迎戰利華古遜，利華古遜首回合主場輸0比1，不過全場形勢佔盡上風，只係於雪中作戰未能把握入球機會，今晚作客有決心收復前失，兩軍實力接近，預期今仗會爭持到最後時刻。賓菲加近況有下滑迹象，加上今場和波都可以晉級，黑柴唔敢講利華古遜可以反先對手，但有受讓之利值得一博，吼2.05倍「讓球客勝」。

（有線63及203台周五凌晨4時05分直播）

計首回合表現，利華古遜明顯較佳，全場主導壓住賓菲加嚟踢，不過雪中作戰場濕地滑，對佢哋組織進攻大有影響，賓菲加下半場憑一次反擊由奧斯卡卡度素偷雞成功，呢場勝仗十分僥倖，今晚雙方主客互易，目前里斯本天氣一流，攝氏15度氣溫下作戰預期雙方都會踢得更流暢。利華古遜近期已經走出低谷，上輪聯賽擊敗奧格斯堡打開今年勝利之門，戰況一面倒，當弗箭頭傑斯寧一射一傳確保勝果，若非對手門將曼寧加神勇，早已大勝一仗，今場作客冇包袱背水一戰，連目前於電視台及報章擔任球評嘅前丹麥國家隊領隊摩頓奧臣都力撐，認為佢哋實力在賓菲加之上，絕對有可能反勝晉級。
賓菲加略跌Watt

賓菲加近期唔弗，前仗聯賽作客國民隊靠對手擺烏龍至和波，上輪主場對弱旅科英布拉大學更要踢到補時3分鐘至靠一個12碼贏波，球隊經頻密征戰下狀態下滑，佢哋雖然好有誠意爭歐霸盃，但聯賽同波圖爭霸關係更加重大，踢完今仗不足三日，就要於聯賽惡鬥今季葡超新貴費利拿，如果比賽去到後段仍然緊湊同膠着，和波晉級都係理想戰果，黑柴寧博受讓嘅利華古遜。