馬體會作客腳軟 卡山睇住食再開W

猪拉多纳

歐霸盃32強首回合魯賓卡山作客以2:0打敗馬德里體育會，成功中止對手今季主場19場連勝紀錄，認真威水。今場次回合賽事返到俄羅斯比賽，魯賓卡山對住不擅作客嘅馬體會要贏多次晉級16強唔難，主勝有2.45倍認真和味。

（有線64、204周五凌晨1:00直播）
魯賓卡山歐霸盃主場全勝

魯賓卡山今季喺歐霸盃取得5勝2和不敗佳績，當中喺主場3戰全勝更不失1球。雖然今場賽事要移師莫斯科盧茲尼基球場舉行，不過對手始終要山長水遠飛去俄羅斯比賽，「卡山」仍佔以逸待勞嘅優勢。形勢上，呢支俄羅斯球隊手握2球喺手，更可以打佢哋擅長嘅穩守突擊。唔好忘記，魯賓卡山係近年少數可以對巴塞隆拿取得1勝2和1負唔輸蝕戰績嘅球隊，縱有守將沙朗洛夫停賽，亦不宜睇小佢哋。

馬體會今季喺西甲騎住皇馬值得一讚，不過佢哋作客成績一般，近9場作客只贏得1場，而且佢哋之前喺歐霸盃分組賽作客對名氣一般嘅科英布拉大學、柏辛域陀尼亞都輸波，相當靠唔住。加上王牌射手法卡奧狀態下滑，前鋒迪亞高哥斯達又坐波監，咁嘅情況仲要焗住攻，隨時重複上仗畀「卡山」偷雞嘅場面。

首回合：魯客勝2:0