曼城難過車關

猪拉多纳

主場打硬仗勝率低

本周英超兩大衰神教頭碰頭，曼城今季喺庸帥文仙尼帶領下無復主場強勢，聯賽主場打硬仗頻頻失分，成為現時被曼聯甩開12分主因，今次主場惡戰車路士冇把握贏波！車仔喺賓尼迪斯帶領下已成神經刀，「肥賓」雖未能服眾，但隊內球員始終有質素，打大波會自動自覺做嘢，受讓半一要下盤！

（有線300及200台周日晚9時30分直播）

曼城上季同曼聯鬥到平頭，最終僅以較佳球差奪冠，全靠喺無敵主場交出19戰18勝1和靚絕成績表，單計主場賽事足足拎多曼聯8分。不過，大軍今季喺主場無復強勢，聯賽五戰前七位球隊錄得1勝3和1負，只係贏過熱刺，仲要係搏到88分鐘先憑迪斯高士哥險勝，對起比上季遇神殺神之勢，完全係兩回事。曼城主場跌watt，反觀曼聯就喺主場錄得12勝1負，一來一回形成兩軍差距12分嘅局面。
高柏尼有傷難擋車仔

曼城球星如雲，正路冇理由得一季貨仔就玩完，一切只怪教頭文仙尼無能，淨係用人唯親，之前寵信契仔巴洛迪利惹來球員反感，近期就不時喺關鍵時刻起用嫡系球員馬爾干及高拉洛夫失敗收場，早前鬥修咸頓更一度擺出「無中堅陣」自毀長城，亂點鴛鴦，惹人詬病。曼城防線重心高柏尼有傷，如果今場佢踢得都好啲，若然唔掂要用尼史葛拍拿斯達錫扼守中路，前者冇態，後者太嫩，同樣唔可靠。

踩到文帥一文不值，查實車仔教頭賓尼迪斯都唔好得幾多，睇佢上周中帶住隊億萬大軍，喺歐霸盃主場驚濤駭浪逼和歐洲三流球隊布拉格斯巴達晉級，就知條友幾唔掂。不過，「肥賓」衰極都係一代盃王，專心部署打一場大波仲有啲料到，大軍依家齊晒腳，抖夠上陣搏殺嘅丹巴巴亞及林柏特勢成曼城心腹大患，有力結束作客曼城三連敗劣績！
曼城今季主戰Top7戰績

和利物浦 2:2

負曼聯 2:3

和愛華頓 1:1

勝熱刺 2:1

和阿仙奴 1:1