撐熱刺作客贏埋

猪拉多纳

落後0:3冇得追 國米提早投降

今晚賽事以歐霸盃16強次回合做主打，阿King就想傾吓國際米蘭主場對熱刺，國米首回合慘吞3蛋，之後返聯賽又輸畀博洛尼亞，老闆莫拉堤嬲到震，省到班球員「立立令」，依家已經將全副心機放晒落爭前3嘅下屆歐聯外圍賽入場券，所以唔好期望佢哋今仗會作出絕地反擊，不妨直取熱刺客勝。

（有線61及201台周五凌晨2時直播）
寧棄雞肋專注聯賽

意甲球隊一向視歐霸盃為雞肋，經常為咗聯賽而作出戰略性放棄，上圈就有拿玻里兩回合計以0比5畀柏辛域陀尼亞橫掃出局。依家國米嘅情況相當雷同，佢哋今季為咗削減支出而出售當家球星史奈達，因此爭取下屆可以參戰歐聯「淘金」成為當前要務。上仗聯賽主場不敵博洛尼亞後，據悉老闆莫拉堤怒不可遏，曾面斥眾球員，並傳出要炒教練施特拉馬斯安尼，施帥深明老闆對歐聯入場券嘅渴求，既然首回合落後熱刺3粒，逆轉無望，加上佢哋依家只係差第3位嘅AC米蘭4分，不如慳番氣爭前3好過。

雖然熱刺亦有當紅炸子雞加里夫巴利停賽，佢哋上仗聯賽又不敵利物浦，但其實演出唔曳，「得分後衞」維頓漢呢輪頻頻有士哥，面對無心戀戰嘅國米，隨時贏埋唔奇，不妨直取客勝。
費倫巴治大盤好路

另一場歐霸柏辛域陀尼亞對呢項盃賽勁有Heart，可惜首回合主場先輸1粒畀費倫巴治，今仗作客想收復失地勢必喪攻，最好捧大盤。

講完歐霸，最後搭多場南美自由盃C組賽事，阿根廷球隊沙蘭迪兵工廠3場分組賽未贏過，擺明唔夠班，相反巴西勁旅聖保羅經驗豐富，為保出線席位，今仗作客一定要喺包尾大幡身上搶晒3分，戰意唔使懷疑，平手盤自然係要聖保羅。