國米傳易帥 讓唔起熱剌

猪拉多纳

施特拉馬斯安尼帥位不穩，今日唔知聽日事嘅意甲球隊國際米蘭，今晚歐霸盃16強次回合主場迎戰英超熱刺，想話收復首回合輸0:3嘅失地，真係談何容易？「藍黑兵團」近排內部立立亂，根本踢唔到好波，今仗仲要讓波，我寧捧有美國國腳丹普西復出孭飛嘅熱刺1.66倍「讓客」好過。

（有線61、64、201及203、廣東體育周五凌晨2:00直播）
董事局斟緊盧捷斯古

國米近排認真濕滯，近6場波只得2勝1和3負，喺意甲莫講話爭標，家陣就連爭入前4踢下屆歐聯都成問題，喺歐霸盃又話輸緊3粒，同出局只係距離一步之差。球隊戰績持續低落，主帥施特拉馬斯安尼自然孭晒大鑊，日前就有消息話，今晚再輸就炒硬佢，不過咪話力奇黑心，就算今晚唔輸，佢又擺得幾耐吖？有指國米董事局已經斟緊薩克達主帥盧捷斯古，又話搵定名將費高做「士啤」，簡單嚟講，球員都知嚟緊換硬主帥，仲會有幾多人肯為佢搏命先？

再者，「藍黑兵團」今晚想反勝都係有心無力，球員狀態差，加上傷兵唔少，施特拉馬斯安尼都話明，今仗排陣會因應球員體能狀況再作定奪，即係唔會強陣啦！前線仲用緊「麻煩友」卡斯辛奴，呢個意大利國腳之前同主帥吵完大鑊，今晚會唔會揸流攤送佢一程，真係難講！
丹普西復出頂替巴利

熱刺周日聯賽不敵利物浦，叫做8場不敗走勢終止。怕佢哋洩咗道氣咩？領隊保亞斯仲驚過你，佢已經話今仗會全力求勝，除咗要振奮番隊波之外，更重要係確保佢哋有機會贏番今季唯一嘅錦標。冇錯，佢哋個首席球星加里夫巴利因為累積黃牌夠數，今晚要坐波監，但好彩係因小腿傷抖咗4場嘅丹普西可以及時傷愈復出，填補番足夠火力，以佢哋上佳狀態，今晚要保住不敗有幾難？

首回合：國客負0:3
國米主場失波多

‧近3次交手熱刺得2勝1負，全部開入球大。

‧國米主場近6戰只得2勝3和1負，5場有失波。

‧熱刺近9戰只逢1敗，近7戰有6場在上半場取得入波。
歐霸盃賽制

今輪為16強次回合，採兩回合制，若總比數打和計作客入球優惠，再和則在次回合後加時，加時仍設作客入球優惠，再和則互射12碼。