狼堡主場中咒睇大「夫」

猪拉多纳

12戰贏得2場點讓波

今晚德甲獨腳戲，同處中下游嘅禾夫斯堡同杜塞爾多夫，為求盡快到達留級安全線，當然想砌低對方避免跌落降班漩渦，但狼堡中咗「主場魔咒」嘅同時，仲有專門送分畀弱旅嘅「特殊癖好」，咁梗係撐受讓半一嘅杜塞爾多夫啦！

（有線64及203、廣東體育周六凌晨3:30直播）
禾夫斯堡迪亞高停賽

禾夫斯堡目前作客成績緊隨拜仁同多蒙特排第3，的確係幾標青，不過個主場就中咗魔咒咁款，今季12次喺自己地頭出戰，得張2勝4和6負嘅成績表，掹掹緊好過降班膽格雷特霍夫，真係衰到要搵窿捐！雖然啱啱主場連鬥班霸拜仁同爭取歐聯入場券嘅史浩克，輸波或者情有可原，弊在遇着雲達不來梅、奧格斯堡同格雷特霍夫呢啲下游分子，全部1:1和波收場，呢吓想爭都爭唔落啦！

再者迪亞高喺上輪作客大炒弗賴堡場波攞咗面黃牌，今場儲夠數坐波監，但冇咗呢位中場指揮官分波派牌同控制節奏都未止，就連冬季喺多蒙特加盟嘅中場比列錫，亦證實左腳膝頭內側韌帶撕裂，教練赫基話最少要抖1個月，喺中場組織力削弱下，缺少輸送嘅奧歷今晚喺前線隨時冇啖好食。
杜塞爾多夫護級搏老命

另邊廂，屬於地頭蟲嘅杜塞爾多夫，季初食住升班氣勢作客連搶7分後，近9場聯賽作客都冇贏過，但當中爆冷逼和過多蒙特之餘，上輪去到安聯球場鬥拜仁更加兩度領先，雖然最終畀謝路美保定一頭頂爆冇分落袋，不過就睇得出杜塞爾多夫「向做升降機說不」嗰種決心，就算隊長林拔斯大腿肌肉撕裂避戰，但今晚對住同自己咁高咁大嘅狼堡，班波肯定搏盡，以1分為最低目標。