大有作為熟透可靠

猪拉多纳

　　全泥夜宴心驚震，小注怡情有覺瞓！阿棟忽然整兩句打油詩，唔係拋書包，而係帶出個事實。呢類場合往往係爆冷溫床，有時唔知點入手，場地模式完全靠估，嘩，真金白銀擺錢，竟然好似盲頭烏蠅，以靠撞形式菠菜，試問有乜謂。奉勸各位，除非好有心水一定要買，假如忍到手，只係心癮的話，打吓水片算嘞。

　　第一場五班1200米。「雄姿儷影」五班擺明超級，季初連谷草1000米一樣贏到，已知分量如何。而一連兩仗跑田草，路程明顯不合，輸得唔遠代表目前唔係冇狀態。

　　雄姿儷影強配搏命

　　今仗小方唔再是但報名，畀「雄姿儷影」回跑四班曾上名嘅泥地1200米，仲要擺個潘頓上去，如果今場唔係想搏命，配搭及路程唔會咁安排，當然，濕泥得唔得，真係冇保證。

　　第五場三班1200米。「銀子彈」今季贏過此程，在濕慢泥地亦曾上名，相比之下，較頭場「雄姿儷影」有揸拿。另外，季中獲安排小休，方仔食腦之人，呢條橋近期頻頻得手，好似「喜競寶寶」、「開心至愛」已經係成功例子。

　　況且，今場對手真係好水皮，全場12匹馬之中，獨得此駒及「快樂無窮」季內曾勝，只要有番贏馬時演出，勝望甚濃。

　　第六場四班1650米。「大有作為」直落4場冇W有Q，準到痺，泥地短途、一哩，以至田草1800米瓣瓣掂，完全係大熟大勇表現！目前在四班，根本冇太多對手可予威脅。另外，郭立基近日支持少咗，呢類實力馬一定跑得醒醒目目，信得過。