朗尼大個仔孭重飛

猪拉多纳

英格蘭唔卸黑山

黑山今晚喺世盃歐洲區H組外圍賽榜首戰主場對英格蘭，受讓都冇着數。年半前朗尼代表英格蘭對黑山場歐國盃外圍賽衰衝動，無厘頭踢迪素杜域搞到喺決賽周初段停賽，今勻冤家路窄，信朗尼佢大個仔孭得起飛要1.7倍客勝。

（now635台及廣東體育周三凌晨4:00直播）

現時黑山以2分騎住英格蘭，今場和波依然可以繼續帶頭，雖然中場柏高域同後衞柏維斯域要停賽，但隊長胡仙歷、前鋒祖維迪同後衞史堤芬沙域全部歸隊，陣容絕對唔弱，上年被曼城趕扯嘅史堤芬沙域更加話，黑山主場氣勢強到難以置信，提醒英格蘭千祈唔好以為可以輕易搶走3分！
「三獅兵團」唔夠中堅

不過咁，年半前英格蘭作客2:2打和黑山，當時「三獅兵團」和波已經夠首名出線，並冇出盡全力爭勝，何況朗尼喺呢場波衰衝動成為全球笑柄後，喺球場上嘅脾氣的確收斂咗好多，賽前英格蘭領隊鶴臣都話，唔相信朗尼會再做傻仔立亂攞牌，睇好佢會帶領英格蘭壓低黑山上榜首，咁嘅情況不妨信朗尼一次。

當然，英格蘭有加利卡希爾受傷，泰利退出國家隊，里奧費迪南又唔肯復出，中堅位置唔多夠人用，但其實英格蘭日前以8:0大炒聖馬力諾，隊長謝拉特、中場柏加同左閘艾殊利高爾並無正選上陣，依家佢哋叉夠電，做番正選打黑山應該有睇頭，而且佢哋多年輕球員，鬥心十足，足以彌補防守缺陷，作客開W唔出奇。

歐洲區H組