FC廣州細味泰囧

猪拉多纳

客戰蒙通聯濕熱難捱

亞冠盃F組賽事，中超富豪球會FC廣州（廣州恒大）今晚作客泰國蒙通聯，FC廣州上周中主場大勝蒙通聯4比0，出線形勢大好，以意大利名帥納比穩陣嘅作風，唔會冒進求大勝，亦要留意泰國天氣炎熱，可能影響客軍球員發揮，客W賠率乏味，寧捧2.02倍入球細。

（now 671周二晚8時直播）

FC廣州領先次席南韓嘅全北汽車兩分排榜首，若然今仗全取三分，而全北又贏日職褪色勁旅浦和紅鑽，FC廣州就可以提早兩輪出線，呢支上季中超冠軍根本唔需要擔心晉級問題，可以「歎慢板」。事實上，FC廣州上輪主場圍攻蒙通聯，都要等到下半場至打開紀錄，其中兩個入球戰至比賽末段，趁對手洩氣先至入到，整體發揮唔算太突出。

FC廣州仲要應付泰國炎熱及潮濕天氣，即使晚間比賽，氣溫亦可能有攝氏35度，加上濕度高，比賽更難捱，相信納比會要求球員放慢節奏，小勝算數。蒙通聯經過上次大敗，返自己地頭點都會加多幾錢肉緊，力拚到最後，阻止FC廣州入波。
全北柏雷素爾添食

同組全北汽車主場對浦和紅鑽，兩隊上星期對賽，全北作客贏三比一，今次輪到紅鑽作客，該日職「破落戶」首場分組賽作客曾吞FC廣州3蛋，證明作客唔多掂，主W有1.82倍值得捧場。

（now 671周二晚6時直播）

其餘要留意嘅亞冠盃仲有H組日職柏雷素爾主場對南韓水原藍翼，佔主場之利嘅柏雷素爾較有勝機，上次對賽柏雷素爾作客以六比二狂勝，簡直當水原藍翼冇到，今次有埋主場之利如虎添翼，再贏一場好正路，捧主W。