沙士菲艾美歷克 默契波利半場和

猪拉多纳

南美自由盃明早有四場賽事舉行，其中D組阿根廷沙士菲將於主場迎戰厄瓜多爾艾美歷克。兩隊現排D組首兩位，今仗打和就可以唔使理另一仗戰果而攜手出線。兩軍今仗大有可能歎慢板等完場，沙士菲贏波賠率太熱唔抵玩，今仗一於捧「半場和」。

（周三早上6時15分開賽）
和波即攜手出線

自由盃D組賽事進入最後一輪，所以兩場分組賽將同時間上演，另一場由烏拉圭彭拿路主場對智利伊基克。沙士菲目前暫以12分排榜首，艾美歷克同彭拿路分別以9分及6分列第二及第三，伊基克只得3分敬陪末席已無緣出線。沙士菲今仗就算輸波，只要唔以大比數落敗仍可首名出線，艾美歷克只要和波取得一分，就可以唔使理彭拿路嘅戰果以D組次名晉級，所以和波對沙士菲同艾美歷克嚟講，都係最理想嘅戰果。

沙士菲剛喺聯賽主場打和聖羅倫素，似乎受到早前作客智利嘅影響，球員體力未回復十足。不過，沙士菲今季大多謀定而後動，最近八場賽事竟有六次取得「半場和」，今仗只要唔大敗就可穩獲D組首名資格，相信會延續近期作風，上半場大歎慢板。艾美歷克近五仗雖錄得全勝，但喺自由盃分組賽作客表現平平，加上今仗只要和波就可穩奪出線資格，相信更加唔會貿然搶攻。艾美歷克近八場賽事同樣有六次取得「半場和」，球隊今仗目標明確相信都會保持控球在腳直到完場。兩軍同樣欠缺爭勝動力，今仗一於捧「半場和」。