車路士雙重後顧 平手盤撐魯賓卡山

猪拉多纳

英超勁旅車路士繼續地獄賽程，今次要作客惡戰魯賓卡山，車仔首回合領先緊３比１，今戰將全力保住勝局，不過，車仔防線出現危機，隨時要用18歲小將尼敦阿基串演左閘，加上周日足總盃４強戰要惡戰曼城，雙重「後顧」下，平手盤宜撐魯賓卡山！

（有線61及64台周五凌晨零時直播）
用無名小卒打左閘

今場係車路士13日內第５戰，平均兩日多啲打一場，雖然話呢班波Hea足大半季，但踢得咁密點都攰啦！近期佢哋防線傷兵多，先有正選左閘艾殊利高爾受傷，連佢個替身賴恩貝特蘭都病埋，一隊冇晒正宗左閘，隨時要搵荷蘭小將尼敦阿基打左閘。阿基仔來自荷蘭，本身踢防中，因為爆炸頭造型被封為新古列治，佢今季喺足總盃落過場，仲係車仔Ｕ19出戰小歐聯（Nextgen）嘅隊長，前途無限，但出到歐戰大場面未夠料擔大旗。

車路士射手丹巴巴亞唔符合上陣資格，前線要由費蘭度托利斯攻堅，現時大軍仲有中堅加利卡希爾養傷，兵源買少見少，最大鑊係嚟緊周日晚佢哋要喺足總盃４強決戰曼城，有場超級大戰在後，教頭賓尼迪斯難免有顧忌。「肥賓」向來算死草，首回合有兩球優勢在手，一定晨早計好晒條數，今場就算輸１粒都可晉級，佢好有機會調整陣容，或會起用馬高馬連及班拿約等後備兵，頂得幾耐得幾耐，爭勝決心一定唔及對手。
落後兩球主隊焗攻

魯賓卡山不嬲都係守強於攻，但今戰唔贏唔掂，都要盡吓人事搶攻。中鋒荷西朗頓頂得撞得，快翼卡拉丹尼斯側擊威脅大，佢哋今屆贏過馬德里體育會，踢落都唔曳，今場放手一搏，贏面較高，平手盤值得一試。
出線條件

魯賓卡山晉級（6.8倍）

‧淨勝3球或以上

‧勝2比0

‧勝3比1，需要加時

車路士晉級（1.07倍）

‧勝或和

‧以1球差距落敗

‧以2球差距落敗，但取得2個或以上作客入球

‧輸1比3，需要加時