車仔撞山 預咗爆大鑊

猪拉多纳

歐霸盃踢到8強次回合，以往呢個賽事曾經出現過唔少問題球賽，形象大受影響，好多行家都有陰影。不過，依家全球監察機構無論大小賽事都（目及）到實，歐霸盃假假哋都係歐洲頂級賽事，全世界咁多對眼望住，相信冇乜人會咁笨以身犯險，正所謂搵食都行遠啲啦！

歐霸盃8路大軍首回合踢落好進取，入球比想像中多，嚟到次回合生死關頭更加冇得保留，隊隊都明刀明槍爭晉級，估計仍然會繼續出現大量士哥，今次出擊重心都揀場大盤。車路士早排贏完曼聯即時生猛晒，近期個勢真係銳不可擋，佢哋首回合主場砌低魯賓卡山，晉級形勢大好，由於仲有爭英超第3名同衞冕足總盃兩項重要任務，因此今場冇必要全力去爭勝，佢哋贏唔贏都得，和波甚至輸一粒亦無傷大雅，賽前莊家開得平手盤，就知車仔雙殺冇「市場」，反觀落後嘅魯賓卡山要反先就要焗攻，預期會踢得幾開放，無論最終勝負係點，相信呢場入波唔會少，呢場玩入球大最好。
撐巴素利威番「刺」

同日英超名牌球隊熱刺作客巴素利，形勢上佢哋要主攻爭勝，依家仲有平手盤，但世事邊有咁着數o架？若果大家有睇首回合戰況，熱刺喺主場出擊都要處下風，唔輸已經好彩，呢班波搏到季尾已經謝謝哋，跌Watt跌得好犀利，冇埋主將加里夫巴利就更加冇乜贏波條件，平手盤正路自然要捧主隊巴素利啦！