辛特侯遜主場強搶布倫瑞克

猪拉多纳

德乙又搵到好嘢，辛特侯遜主場對布倫瑞克，尾二鬥老二，表面上辛特侯遜級數輸一大截，其實係禾稈冚珍珠，佢哋集中火力喺自己地頭護級，遇上前列強隊都未驚過，憑頑強鬥志及決心頻有佳作。布倫瑞克剛輸完榜首大戰，難爭一哥，升班資格亦已十拿九穩，可以等抖暑，讓波當然信唔過，力捧「讓球主勝」。

（周六凌晨零時開賽）

包尾嘅雷根斯堡好大機會降班，另一個直接降班位置，相信離不開辛特侯遜、波琴，以及特雷斯登。現時以辛特侯遜情況最惡劣，落後尾三波琴三分，基本上每場都要搏，不過礙於人腳質素有限，佢哋只能集中力量主場搶分，希望憑球迷聲勢激發鬥心，創造奇迹。呢招效果唔錯，對上一次主場更逼和爭升班分子凱沙羅頓，大大鼓舞球隊士氣，今場喺布倫瑞克身上搶到分絕對唔出奇。

布倫瑞克已經拋離第三位凱沙羅頓十分，直接升班唔成問題，本來仲想攞番個冠軍威下，但上仗慘吞榜首哈化柏林三蛋後，爭冠機會大打折扣，難免洩氣，依家隨時踢風流波，戰意唔及背水一戰嘅辛特侯遜。
布軍遇弱愈弱

仲有一點值得留意，布倫瑞克有遇弱愈弱弊病，今季試過失分畀弱隊奧厄、阿倫、杜伊斯堡，即使首循環主場亦只係僅勝辛特侯遜2比1，加上布倫瑞克鬥心及狀態下滑，實在讓唔起對手。