流浪者食住個勢o趙獅吼

猪拉多纳

澳職季後賽4強大戰，西悉尼流浪者1.85倍主勝咪錯過！流浪者喺常規賽憑住穩定演出，同季尾一段12戰11勝1和不敗氣勢，首度參戰就成功奪冠，個勢咁好，梗係想趁機攞埋總冠軍啦，今日佢哋喺主場迎戰布里斯班獅吼，大有機會4度擒「獅」！

（有線64及廣東體育周五下午5:30直播）

流浪者自收咧戰後抖咗兩個禮拜，令人質疑佢哋嘅比賽狀態，但正如隊長比奧甘喺賽前接受專訪咁講，呢段時間可以畀班波差足電再搏殺，最重要係喺收咧戰受傷缺陣嘅中場主力小野伸二、艾朗穆爾同普蘭斯，能夠趁機養傷，今日可以復出披甲，配合夏列迪同馬克布歷治喺前線數胡，要保持常規賽嘅表現唔成問題。

季初將目標鎖定總冠軍3連霸嘅獅吼，整季表現有心無力，上季神射手貝利沙更「產量」大減，掹車邊攞到季後賽入場券後，喺衞冕第1擊雖然砌低咗阿德萊德聯，不過代價係中場核心布萊治同魯克巴坦受傷，加上今季3度火併流浪者全部落敗，瓣瓣秤都輸晒，今日係時候執定包袱喇。
澳職季後賽賽制

一場過決勝負，若90分鐘內打和需加時，加時再和即互射十二碼。