米禾爾爭盃決心強唔赦韋根

猪拉多纳

米禾爾同韋根今晚會師倫敦溫布萊，合演英格蘭足總盃4強賽事。米禾爾雖然位處英冠中下游，但之前砌低過阿士東維拉，除咗證明佢哋搶盃嘅鬥志，亦反映咗佢哋同英超球隊唔係冇得鍊，今勻遇着喺英超降班漩渦苦苦掙扎嘅韋根，有得受讓梗係捧2.05倍「讓主」。

（now633及660台、廣東體育周日凌晨0:15直播）

韋根近排雖然頻頻搶分成功，但始終走唔出降班區，上場護級生死戰作客昆士柏流浪，大部分時間打多個都咬唔入對手不特止，仲要畀人偷雞成功，就算憑住箭頭馬隆尼喺完場前補時罰球建功，僥倖執番1分，但演出真係睇見都唔開胃。況且伯明翰喺2011年為咗爭英聯盃，最終係就係攞咗冠軍，不過喺英超降埋班嗰吓弊呢，有前車可鑑，相信韋根主帥馬天尼斯都會識得點揀。
波飛銷量贏韋根成條街

再者，米禾爾獲分配嘅3萬幾張波飛全部賣得一乾二淨，相反韋根就（火羅）爆滯銷，退番過萬張波飛畀賽會，難為教頭馬天尼斯仲狡辯：「我知道有人拎呢啲數字嚟比較，但我哋唔在乎，最重要係我哋每年粉絲人數都有增加。」無論粉絲有冇多到都好啦，唯一肯定嘅係打氣聲勢肯定會輸蝕過米禾爾。

米禾爾喺今屆英總表現穩打穩紮，除咗淨勝普雷斯頓、盧頓同布力般流浪，對住英超嘅維拉雖然處於落後劣勢，但就後勁韌力十足，最終反勝2:1晉級，今場除咗2.05倍「讓主」抵博，3倍「主隊晉級」亦值得冷敲o架！