屈福特森林讓波要反

猪拉多纳

英冠爭逐殺到入直路，今晚大開快車，踢得咁密當然吼「下盤波」嚟捧！搏到季尾鐵人都散，所謂強隊作客讓波盞搞，屈福特、諾定咸森林一隊腳風唔順，一隊被打窒道氣，要晒米禾爾同米杜士堡「讓球主勝」！

（周三凌晨2時45分開賽）

一向都話英冠波實力接近，周六搏完「常規」聯賽，過三日又要再度落場，稍為冇咁弗，精神狀態唔夠硬淨，分分鐘被打巢！不嬲覺得「英冠快車」唔係出擊場合，事關變數太多，如果要玩都只宜小注，同埋搵受讓一方嚟捧。
米禾爾硬淨恰到屈軍

屈福特今季異軍突起，應贏則贏正氣到爆，仲成為唔少大盤客愛隊。但球季長路漫漫，到近期已進入調整期，勝率驟降下讓波就唔划算，睇吓上仗作客彼德堡，一度落後三粒，到最後追番兩球只係假象。今次「黃蜂兵團」作客米禾爾，米軍雖剛於足總盃四強出局，但不敵韋根正路不過，根本無損球隊士氣。米禾爾目前仍深受降班威脅，其硬淨打法恰到屈福特，主場受讓要「讓球主勝」。

諾定咸森林自二月請比利戴維斯回巢後，曾一度取得聯賽六連勝，但之後狀態回落，上仗更慘吞卡迪夫城三蛋，狀態明顯「箭嘴向下」。今次作客米杜士堡，米堡雖然狀態麻麻，但主場始終有戰鬥力，預計可搶得分數，捧「讓球主勝」之餘，要埋細盤。