拜仁爭3冠-2都係「堡」

猪拉多纳

為列貝利而戰，向柏林進發！拜仁慕尼黑要成就三冠王霸業仲有兩關要過，今晚佢哋會喺安聯球場恭候禾夫斯堡，上演德國盃4強戰。拜仁教練軒歷基斯講到明會「夫添」出擊，以雲拜頓為首嘅一班球員，賽前亦都話要為停賽嘅列貝利而戰，希望帶隊殺入6月2號假柏林舉行嘅決賽，等埋列貝利齊齊落場捧盃，戰意旺盛成咁，2倍「讓主」就算要讓到「-2」都捧得過！（無綫翡翠台周三凌晨2:30直播）
列貝利停賽隊友加把勁

拜仁已經提早封王德甲，家陣會集中火力爭歐聯同德盃，教練軒歷基斯喺上禮拜六場聯賽派咗8件後備兵落場，結果一樣大炒紐倫堡4蛋，睇得出班波狀態一流之餘，亦證明佢哋對今晚場德盃4強戰極度重視，畢竟4強另一條線只係史特加同弗賴堡，如果拜仁過埋禾夫斯堡呢關，德盃幾可肯定係佢哋囊中物。

據悉，上場聯賽休戰嘅主力好似湯馬士梅拿、文迪蘇傑同拿姆等等，喺德國時間禮拜日操足90分鐘，主帥軒歷基斯講明唔會輕敵，今仗會派強陣出擊，除咗卻奧斯同畢斯杜巴兩位十字軍之外，今晚就只有喺16強領紅嘅列貝利要繼續停賽缺陣。盛傳畀意甲幾支球隊睇中、6月回復自由身嘅守將雲拜頓尋日向《慕尼黑日報》表明，今仗要為列貝利而戰：「列貝利希望同我哋一齊去柏林踢德盃決賽，成班手足都會幫佢完成心願！」
禾夫斯堡近6仗得1勝

拜仁最近贏到唔曉停，反觀今晚對手禾夫斯堡近6仗就只曾1勝，對上6次作客拜仁亦都全部輸晒，近況同往績都咁曳，真係睇唔出有咩機會爆冷。況且以巴西中堅拿杜為首嘅防線已經連續9場失波，連上仗主場對住賀芬咸都要失兩粒，今晚去到安聯球場點頂洛賓、湯馬士梅拿同文迪蘇傑呢個攻擊鐵三角嘅進襲呀？
球證旺拜仁5戰全勝

‧今仗執法球證卻查曾經吹過5場拜仁嘅德國盃賽事，5場拜仁都贏波。

‧禾夫斯堡上一次作客砌低拜仁已經要追溯至2009年。

‧雙方今季兩度喺德甲交手，拜仁分別主場贏3:0、作客贏2:0。
信往績吼實半場1:0波膽

拜仁呢期贏到開巷，相信近9仗場場有失波嘅禾夫斯堡做梗炮灰，睇番雙方今季喺聯賽兩循環交手，禾夫斯堡無論主場定作客都喺半場落後0:1，再睇埋「狼堡」近4次造訪拜仁紀錄，當中足足有3次半場落後0:1，咁好路冇理由唔追個2.95倍嘅半場1:0波膽。
德盃、法總賽制

德盃今輪為4強賽事，法總為8強，如法定時間內打和將加時30分鐘，再和則互射12碼決勝。