羅馬聖西路搵米

猪拉多纳

老細手緊藍黑兵團謝晒

意大利盃4強次回合由「藍黑兵團」國際米蘭主場對羅馬，首回合羅馬憑主場之利贏二比一，今次輪到羅馬到訪聖西路，依然睇好首都球隊。實在今季國米陷入低潮，無論在意甲及歐洲賽都打唔出預期水準。不過影響最深嘅唔係球隊本身，其實係老闆莫拉堤唔掂。依家國米已經冇晒氣勢，今場讓波唔抵玩，「讓球客勝」可捧。

（now632周四凌晨2時45分直播）

莫拉堤家族長期支持國米發展，斷斷續續接近60年。經歷過「大國米時代」以及「三冠王」兩個盛世之後，莫拉堤家族似乎氣數耗盡，唔能夠再為國米帶來驚喜。最新消息，莫拉堤家族繼2006年之後再度出售祖業股份，將石油公司Saras其中13.7%出售畀俄羅斯油企Rosneft。
莫拉堤放盤套現離場

國米會長莫拉堤同佢阿哥基安馬高各人大約可套現6000萬歐元（約6.1億港元），反映出國米最大靠山已經唔多掂。據悉莫拉堤家族持有Saras嘅股權已經跌至50.02%，成班二世祖敗晒老父盤生意，老莫拉堤泉下有知真係隨時激到喺棺材彈起。

當年莫拉堤係球壇「大花筒」，朗拿度、韋利等巨星任你開價。但正所謂坐食山崩，莫拉堤近幾年向球隊注資縮晒水，睇怕過多幾季賣埋國米都似。大家都記得上季國米班高層就曾經拉大隊到中東，表面話係足球交流，實際係傾收購事宜。

莫拉堤家族衰落，連累莫老闆冇錢繼續搞波，球隊成績好自然下滑。意大利盃踢成點？莫拉堤真係話之你啦！最緊要係搵到新財團接手球隊，攞番筆現金好好過埋下半世仲實際。國米唔係波，今場羅馬受讓捧得過。