地頭出擊例劏弱旅 慕遜2倍主W博得過

猪拉多纳

今晚德甲獨腳戲慕遜加柏主場迎戰奧格斯堡，雖然主隊近排啞晒火，不過呢班波主場戰績勁穩定，面對下游分子仲好少「甩轆」添，難得個主W有2倍咁好分，當然抵捧啦！（有線64、203及廣東體育周六凌晨2:30直播）
奧格斯堡前鋒作客死火

慕遜加柏賣走咗前鋒馬高列奧斯、守將丹迪等主力後，今季仍然可以保住中上游位置，其實已經算交足功課喇！不過人望高處，教練法夫爾日前仲豪言，會喺淨低5輪賽事搶分，力爭來屆歐霸席位添！係，雖然班波近排狀態麻麻，但佢哋主場戰績一向有保證，近10場不敗之餘，對住格雷特霍夫、杜塞爾多夫、禾夫斯堡呢啲弱旅都無驚無險搶晒3分，今晚又點會突然走樣先？

仲有呀，雖然慕遜今季嘅鋒力不及上季，不過連續兩場主場有波入嘅荷蘭射手盧克迪莊早喺川迪已經成名，喺上年夏天加盟嘅佢嚟到季尾亦終於融入球隊，有佢同艾蘭高等主將拍住上，有力撕破客軍防線o架！至於奧格斯堡前鋒池東沅上場雖然梅二開度備受好評，但呢位南韓射手今季作客1球都未入過，啱啱復出嘅具滋哲狀態又未足，今場想搶分？難啲喇！