甲府風林作客王捉天鵝

猪拉多纳

日職周一開快車，今次誠意向大家介紹「隱形作客王」甲府風林，呢班波已經保持跨季廿六場作客不敗，今季客場連鬥多支日職實力分子都唔使輸，異常硬淨，今輪造訪新潟天鵝又有得受讓，梗係要「讓球客勝」啦！

（周一下午1時開賽）

甲府風林上季喺日乙全季作客廿一戰僅輸一場，拎住日乙作客王招牌殺上日職，今季繼續保持強勢，聯賽連盃賽七次作客都唔使輸，包括賽和仙台維加泰、鹿島鹿角同橫濱水手等實力分子，喂，對手唔曳喎，真係堅勁o架噃！風林保持跨季廿六場不敗，上季作客輸波係去年三月，距今足足一年有多，非常誇張！佢哋放走王牌前鋒達維，但搵番另一有料射手曉高甘馬雷斯幫手，穩守突擊戰術好有效，唔好睇小。
松鼠弗爆斷三箭

新潟天鵝今季整體人腳冇乜變動，勝在夾慣夾熟，隊內土炮如成岡翔、川又堅暮及岡本英也等都偶有佳作，戰績不過不失。不過，佢哋最大問題係欠缺高產射手孭飛，巴西前鋒般奴盧比斯本屬理想人選，可惜佢今季冇貨交，令球隊進攻火力受削。天鵝今季聯賽主場四戰三敗，踢落唔多對辦，佢哋作客受讓有時都偷到雞，但主場讓波真係靠唔住，今次仲要撞着作客演出特佳嘅甲府風林，必捧「讓球客勝」。

同日「一哥」大宮松鼠主場對上季冠軍廣島三箭，松鼠開季順風順水，已經進入化境，一對斯洛文尼亞球星路華高域同隆比真歷有質有態，等閒之輩真係好難頂得住。三箭喺亞冠盃出局畀人睇晒底牌，班波係咁多料，對住弗爆嘅松鼠唔夠砌。