新特蘭破「城」搶分求生

猪拉多纳

迪肯尼奧播「恥辱影片」激勵球員

如果你問亨格比利，邊位英超領隊最識得激勵球員，我相信迪肯尼奧肯定數一數二！呢位意大利型佬為咗帶領新特蘭逃出生天，唔單止搵番陳年威水史振奮士氣，仲逼球員睇「恥辱影片」，搞咁多嘢都係為咗今晚喺史篤城身上搶3分。迪帥感染力咁強，照計「黑貓」吸取過上星期輸大鑊嘅教訓後會反彈，對住「私房菜」史篤城讓平半照捧上盤。（有線200、300及廣東體育周二凌晨3:00直播）

睇番聯賽榜形勢，新特蘭目前只係Lead住尾三嘅韋根2分，護級任務尚未成功，今晚場獨腳戲當然唔可以掉以輕心。睇見「黑貓」上星期作客輸畀阿士東維拉1:6，大家可能會戥呢班波擔心，不過領隊迪肯尼奧就幫班手足解畫，話佢哋接連砌低紐卡素同愛華頓之後係High過頭，承諾今晚場波會做齣好戲省番靚招牌喎！
史篤城作客光明球場冇運行

佢老人家唔係齋噏，尋日係新特蘭封王足總盃嘅40周年紀念，迪肯尼奧賽前藉1973年嘅捧盃陳年史，向球員帶出「弱旅都可以做大事」訊息，除此之外，佢仲逼班手足坐定定翻睇輸畀維拉場波嘅DVD添，做咁多嘢無非想激勵班手足，相信即使球會年度最佳球員施斯隆要坐波監，「黑貓」為面子同護級都依然夠晒爭勝決心。

反觀作客嘅史篤城連贏兩場之後，護級形勢唔算險峻，鬥志就肯定唔及新特蘭o架嘞，最重要係光明球場對於史篤城嚟講一啲都唔光明，佢哋過去19年造訪新特蘭地頭都未贏過，對上6次作客「黑貓」更只係錄得2和4負劣績，擺到明畀新特蘭食住喎！
黑貓主場對賽冇失過波

新特蘭近4次主場鬥史篤城錄3勝1和兼保持不失。

今季英超最低射門中框率隊伍係史篤城，僅得38%。

史篤城已經連開18口半場細。
雙方火力弱玩細啱數

施斯隆同史提芬費查包辦新特蘭今季46%聯賽入球，奈何一個要停賽，一個就因傷提早收咧，「黑貓」得分手可謂買少見少，撞啱對家史篤城出名鋒力弱雞，35輪聯賽過後僅入31球，大家火力都咁水皮，1.52倍細熱都要撐啦！