韋根撲殺天鵝救命

猪拉多纳

韋根今晚英超主場對史雲斯，韋根冇時間諗嚟緊周六嘅足總盃決賽，最重要係聯賽搶分護級，呢支「護級專家」近期已踩盡油豁出去一搏，踢出無比鬥心，強如爭緊歐聯入場券嘅熱刺都贏唔到佢哋，更何況一早等抖暑嘅「天鵝」史雲斯。尤其係「天鵝」射手米捷受傷提早收咧，更加欠缺反擊之力，睇怕只能任由對手宰割，主W1.7倍夠穩陣，回報亦不俗。

（有線301及201台周三凌晨2時45分直播）
史雲斯冇米捷唔使預

未計昨晚賽事，韋根只係落後尾四新特蘭2分，以及少紐卡素同諾域治3分，但踢少紐、諾兩隊一場，護級仍有希望，當然首要任係爭取贏晒餘下三場聯賽。事實上，韋根過去三季都喺下游掙扎，最終都大步檻過。球隊近期又發揮「護級專家」凌厲後勁，上次主場如非保斯完前場1分鐘擺烏龍，可能已擊敗熱刺，上仗作客反勝西布朗3比2，盡顯打不死鬥志。

韋根球員抱住保命求存嘅心態，現時士氣及狀態處於全季高峰，成為對手嘅噩夢。由於韋根下輪要硬撼阿仙奴，今場遇上踢風流波嘅史雲斯，唔攞晒3分，更待何時？

至於史雲斯自從2月尾奪得英聯盃冠軍後，今季已超額完成任務，成績亦立即走樣，近7場聯賽僅3和4負，更已連續三場冇波入。屋漏兼逢連夜雨，今季聯賽入咗17球嘅米捷上仗受傷，緣盡餘下比賽，冇埋呢位西班牙射手，「天鵝」可以話係等劏。