白禮頓唔赦老鷹

猪拉多纳

作客硬淨守細一流

「老鷹」折翼冇攻力，搞唔掂「聯賽防守王」！英冠升班附加賽四強首回合水晶宮主場鬥白禮頓，水晶宮神射手格連梅利大跌Watt，「神經領隊」荷路維(抓)爆頭都冇計；白禮頓屬英冠落敗率最低，兼失波最少球隊，捧「讓球客勝」同細盤！

（周六凌晨2時45分開賽）
神經刀教唔掂水晶宮

荷路維一向係神經刀，之前帶黑池喺英超都大打進攻足球，上年11月開始帶領水晶宮，一揸旗已經大數葉士域治5比0，但球隊表現大起大跌，到季尾十戰竟然只係贏得一場咁大把，狀態沉到不得了，如果聯賽打多幾場，水晶宮未必入到前六打附加賽。

水晶宮前鋒格連梅利榮膺本季英冠神射手，不過佢近九場入得一球，仲要係12碼，反映佢威力大減；仲要佢其實係前白禮頓球員，被捉晒路更難也文也武。另一主力韋費特沙夏仲衰，周時掛住講下季轉投曼聯，已經十場冇貨交。

反觀白禮頓於前車路士中場硬漢普耶帶領下，長期保持穩定，同冠軍卡迪夫城全季僅輸九場一樣咁勁，而客敗率更低到不足三成，係聯賽輸波比率最低球隊。白軍後防穩陣，全季46場僅失43球，一場失一球都冇，喺英冠嚟講的確係韌到爆！今次首回合作客出擊，普耶下令必大踢防守足球，以白禮頓狀態實力可保不敗，而且入波預期亦唔會多。