夫添白禮頓大鬧水晶宮

猪拉多纳

今晚英冠升班附加賽首回合，水晶宮喺主場迎戰白禮頓。水晶宮主帥荷路維賽前訂好目標，話會諗計應付白禮頓，要喺兩回合附加賽贏1場喎。目標清晰係好事，之不過卡爾萬就好質疑呢個計劃嘅可行性，都係捧夫添出擊、受讓平半嘅白禮頓下盤好啲。（開賽時間：周六凌晨2:45）

水晶宮雖然有「鷹」嘅綽號，但係就冇鷹嘅威風，季尾階段衰到連續9場未贏過，得5和4負之餘，輸波仲要例牌吞蛋。佢哋喺收爐戰面對彼德堡，雖然兩度落後下反勝3:2，但如果唔係彼德堡喺領先後不思進取，全軍退守得嚟又要甩甩漏漏，水晶宮邊有得贏波吖！
水晶宮一對箭頭鬧入球荒

水晶宮反彈只係假象，不過前鋒啞火就千真萬確，除咗曼聯借將韋費特沙夏唔經唔覺陷10場入球荒；至於啱啱同球會續約到2016年嘅格連梅利，今季聯賽入球達到30+，弊在最近9戰淨係入過1球12碼，跌Watt跌成咁，想靠佢倒戈射死舊主﹖瞓覺發夢好過啦。

對家「海鷗」白禮頓以第4名飛過終點，唔單只係球隊近30年嚟最好成績，聯賽失波仲要少過直接升班嘅卡迪夫城同侯城，防線絕對有Q嘜保證。白禮頓今仗有右閘恩尼高卡達朗坐完波監復出，做替工嘅大衞盧比斯可以打番中場，夥拍助攻王奧蘭迪派牌分波，連同近排踢到曉飛嘅兩翼卡辛加路亞、韋畢卡利，箭頭艾殊利班尼斯同荷西烏路亞又冇病冇痛，今晚挾住3連勝強勢出戰，想輸都難啦！
英冠附賽制

主客兩回合制，今輪為準決賽首回合。若兩回合計打和，將於次回合法定時間後加時30分鐘，再和則以互射12碼定勝負。