薩拉搶分護級追打利雲特

猪拉多纳

今晚西甲由利雲特主場迎戰力爭護級嘅薩拉戈薩，利雲特唔愁降班又無得爭踢歐洲賽，就連教練都無心戀戰，成班友都冇鬥心；相反，薩拉戈薩最近回勇，連贏2場後升上第17位，為咗留喺西甲，薩拉戈薩肯定搏盡，2.48倍「客勝」不妨一試。

（開賽時間︰周六凌晨3:00）
普斯迪加話明搏到底

利雲特由4月開始就5戰不勝，當中更試過喺主場輸畀另外2支護級球隊切爾達同拉科魯尼亞。主帥桑馬天尼斯仲喺賽前暗示攞到41分就夠，可見成班波只係等放暑假，加上佢哋近10場比賽只係攻入4粒，鋒力欠奉，叫人點撐得落手？

薩拉戈薩連開2場W，家陣手握護級主動權，首席射手普斯迪加話：「我哋連搶6分後信心大增，成班手足為咗護級，一定會搏到底！」事實上，薩拉中場艾邦奴今季表現出色，至今攻入9球，平咗自己職業生涯一季入最多入波嘅紀錄。有呢對喪攻孖寶壓陣，配合兩軍近7次對賽，薩拉戈薩贏咗5次，今鋪客W仲有一定分頭，博得過。