勁酒王加罩實搏

猪拉多纳

　　連日大雨，今日應該唔例外，場地唔會冇受到影響，草泥地狀況唔會好得去邊。呢類場合向來唔係阿棟出手時機，雖然講到口臭，不厭其煩再重覆，每逢遇到唔明朗局面，切勿搏命，如果真係忍唔住手，買番啲止吓咳算數，細細哋玩玩，志在參與，中咗得啖笑，輸咗唔肉赤。

　　第六場四班1600米草地。「馬來之珍」跑3場表現非常反覆，一時追得鬼死咁勁，一時話冇就冇，4歲馬嫩口所致，下季先會係收成期，情況有小小似同馬房「喜樂洋洋」。但由於有虛分在手，四班點都有着數，季尾時份仲肯跑，無非想贏番場。用到韋達，唔怕熱，但求穩中求勝，只要跑出僅負於「友誼大使」水準，可一舉反先對手。

　　第九場三班1650米泥地。「奪金」已經搏咗兩場，取得1W1Q，今次擺個韋達上去，唔似係有收手意思，其實，此馬上季曾經試過連續3場跑入前三名，屬於耐拼型，加上今仗有1檔之利，雖然再遇「熱爆男」，未必冇本事反敗為勝。

　　第十場三班1400米草地。「勁酒王」初出跑第四，再出轉爭1400米，重飛之下跑到三甲都冇，令人大跌眼鏡。睇隻馬上次臨場觀感係比前吸引，搏失原因或與陣上搶口有關。今次特登加防沙眼罩，實際上有冇幫助，真係唔敢講，但阿蔡有此安排，起碼肯去變，反映有心爭勝。有冇對呢匹馬睇得太高，今仗應該睇到一清二楚。

　　點買法

　　今日鍾意3匹韋達坐騎，但唔等於要3匹要晒，坦白講，尾場「勁酒王」係纜躉，要孖1匹則會揀「馬來之珍」。至於全日QT心水，亦係第六及十場，估計係熱門馬天下。