足總盃志在必得 曼城快刀除根

猪拉多纳

曼城「三年抱兩」志在必得，遇私房菜半場可「除根」！曼城、韋根聽日凌晨會師溫布萊球場，爭奪本屆英格蘭足總盃冠軍，講牌面、論質素、比鬥心，曼城都唔止高對手一班，近七次對賽又全部淨勝，「失波王」韋根半場都捱唔住，捧曼城「半場勝」！

（now 635周日凌晨零時15分直播）

呢個決賽Match-up，可謂強弱懸殊，曼城為保本季最後一個捧盃希望肯定去到盡，上仗聯賽領隊文仙尼就收起阿古路、耶耶托尼等8個主力，為今場決賽備戰。曼城聯賽衞冕失敗後，表現反而更佳，前中場阿古路、泰維斯、耶耶托尼弗到震，大衞施華傷愈後亦打得好生猛，最難得係打起埋拿斯尼同迪斯高，個個都數到胡，韋根又嘜得邊個？加上隊長高柏尼復出亦令成隊波定番晒，咁嘅卡士、經驗，今場不勝無歸。
近七次對韋根全勝

雙方近七次對賽，曼城全部贏晒兼一球不失，韋根嘅小組入楔進攻，遇着曼城後防根本毫無功效，領隊文仙尼唔畀赫特打正選，改用羅馬尼亞門將彭迪利蒙，亦都唔會影響大局。最弊係韋根依家心繫護級，最近場場都搏到好盡，但依然徒勞無功，來季降班機會好大，士氣當然唔慌好。

其實韋根中前場組織力唔曳，馬隆尼、卡林麥馬拿文都弗，但後防就太爛，上仗對史雲斯雖然兩番領前，但後衞一而再、再而三犯錯，最後跌晒三分。事實上，韋根係英超失波王，咁嘅質素點頂得住曼城？

曼城兩年前殺入足總盃決賽，遇着豬頭骨史篤城，最後到換邊後先由耶耶托尼一箭定江山，小勝1比0捧盃，今次半場會唔會又贏唔到？查實史篤城防守力遠勝韋根，加上韋根近期攻大咗個頭，呢場縮後盞死快啲，近四戰有三仗都喺上半場先失波，今次一於吼曼城「半場勝」，首名入球可吼阿古路或耶耶托尼！
近10屆旺大

回顧近年英足盃決賽成績，車路士可算大贏家，球隊在對上四屆曾三次奪標，唯一打破其壟斷嘅正正係兩年前嘅曼城。

近十屆決賽比數，若以中位數「2.5球」計較多開「大」，曾開出六次。出現得最多的波膽則為「1:0」，共有4次，其次為「2:1」，共2次。而最上述10仗中，只有三次未能在90分鐘內分出勝負，當中有兩次要以互射12碼決勝。