如果我教緊韋根……

猪拉多纳

曼城對韋根，如果呢場係聯賽，相信曼城贏波實食冇黐牙，但去到足總盃決賽，就唔同咁講法，曼城要大勝有難度。細鬼都踢過波、教過波，任你係幾大牌嘅球員或者領隊，落到場始終會小心翼翼。如果我係韋根教頭，會叫班球員將聯賽護級丟埋一邊，專心一意打好防守，當時間一分一秒咁過，對手壓力愈來愈大，到時就有機會爆冷偷雞。
拖慢節奏 你急我唔急

其實今場決賽，所有壓力都放喺曼城一面。如果連呢個盃都攞唔到，領隊文仙尼極可能連份工都冇埋，陣中球星亦肯定被笑到面黃，就算佢哋真係高一班波，但都唔係話贏就贏。如果我教緊韋根，必定屯重兵喺後防，兼夾將比賽節奏有咁慢拖咁慢；利用球隊組織力唔錯呢個特點，盡量控球在腳，總之就你急我唔急，首要目標係捱到半場不失，希望對手之後愈打愈亂龍，先會有勝算。

細鬼由細睇足總盃睇到大，呢個盃一向有爆冷溫床之稱，只因英格蘭球隊都好有鬥志，就係呢份唔服輸嘅精神，往往搞到較強一方自亂陣腳，最後連個盃都畀埋人哋。今場曼城個贏波賠率根本冇肉食，如果要投X嘅話，細鬼寧博韋根「讓球客勝」，3.35倍幾好分o架！