車路士1.65倍冠軍酬賓

猪拉多纳

獵鷹獻盃賀阿布入主十周年

歐霸盃決賽今晚喺荷蘭阿姆斯特丹球場上演，由葡超班霸「飛鷹」賓菲加決戰英超勁旅車路士。今年係車仔老細阿布拉莫域入主十周年，若能贏埋歐霸盃就可儲齊英格蘭及歐洲各大賽事冠軍，主帥賓尼迪斯捱鬧半年只為拎埋呢隻盃砌靚自己份履歷表，撞啱賓菲加剛於葡超「冠軍決戰」輸波被打窒道氣，車路士奪冠賠率有1.65倍，值得一試！

俄羅斯油王阿布○三年六月買起車路士，入主後贏盡英格蘭國內聯賽、足總盃、聯賽盃及社區盾冠軍，上季終於圓夢取得歐聯冠軍，只要今次贏埋歐霸盃，佢就可以擸晒歐洲兩大錦標，仲會成為史上首支接連贏得歐聯同歐霸盃嘅球會，呢個榮譽確係阿布上「車」十年嘅最佳禮物。車仔近年頻頻換帥，連老臣子泰利同林柏特等都地位不保，眾將為咗討好老細，必定會喺呢場大戰交出120%力量奮戰。

車路士領隊賓尼迪斯亦都好恨捧歐霸盃，佢肯屈就做看守領隊，無非係睇中車仔有潛力捧盃執靚佢份履歷表。「肥賓」上年年尾大意失去世冠盃，之後慘被車迷喪鬧，為咗保住歐洲盃王之名，今次不容再失。經佢精心部署後，大軍捱過魔鬼賽程殺入決賽，雖有射手丹巴巴亞唔符合上陣資格缺陣，但有出戰歐霸盃表現特佳嘅「王子」費蘭度托利斯攻堅，仲有剛成為球會史上射手王林柏特在陣，氣勢甚勁。
賓菲加剛被波圖打窒道氣

「飛鷹」上次贏得歐洲頂級大賽已經要追溯到一九六二年，今次都好希望一搔五十一年之癢過吓捧盃癮。論實力佢哋絕對拍得住車路士，踢法亦比對手悅目，一對射手洛迪高利馬同奧斯卡卡度素好鬼犀利。不過，賓菲加剛於葡超榜首大戰惡鬥死敵波圖，踢來患得患失，最終被對手絕殺，仲要畀人爬頭，有如將聯賽冠軍拱手相讓畀波圖，令士氣嚴重受挫，班兵隨時謝晒。

車路士賽前封鎖有關隊長泰利及進攻重心夏薩特傷情嘅消息，兩人今戰上陣成疑，車仔今季喺社區盾、歐超盃及世冠盃等賽事先後失利，已經受夠挫敗，趁對手不在最佳狀態，今次有望威番鋪。今場開出車路士讓平半，上盤可小試，個人認為捧冠軍仲好，避免車仔喺九十分鐘和波，去到加時或十二碼先贏。