佐加頓斯好守得 哥登堡半場咬唔入

猪拉多纳

有「防守大師」帶隊，仲要鎮守斯德哥爾摩，佐加頓斯有力一戰！瑞典盃決賽佐軍挑戰哥登堡，前特林素主帥賀格模本季執教佐加頓斯，球隊大踢守勢波，去到決賽當然話唔出就唔出，哥軍遇死守球隊亦冇乜計，吼「半場和」同細盤！

（周日晚11時開賽）

瑞典盃舊年停辦一屆後，今年捲土重來，由第3圈轉踢分組賽，多支勁旅如馬模、艾夫斯堡、赫根等都早早出局，睇到瑞典盃依然不受強隊重視。今次決賽將於AIK蘇納主場蘇納友誼球場舉行，佐加頓斯、AIK同樣來自首都斯德哥爾摩，兩軍不嬲都唔咁啱牙，佐軍當然想喺死敵主場威番鋪。哥登堡就慘啲，要「作客」之餘，斯德哥爾摩近期仲日日暴動，未踢已經嚇餐死。
入球細亦可兼顧

本季佐軍成績麻麻，主要係因為新帥賀格模初來埗到，但近期表現已有明顯改善，先擊敗馬模，再作客打和AIK，賀帥常用嘅穩守突擊戰術，於佐軍身上已見小成。賀帥由08年開始執教挪超特林素，當季即成聯賽「防守王」，另外有3季都係當季第2失波數字最少球隊，今場決賽仲要遇強，當然以守行先。

哥軍近4戰有3次入得1球，呢班波面對死守球隊冇乜入波扳斧，今戰先揀「半場和」，細盤亦要兼顧。