領航精神拔頭籌

猪拉多纳

　　剛戰尾場潘頓退下火線，據悉騎者疑生腎石，而昨日他到醫院接受相關治療，明晚六匹坐騎全部要換人。

　　坦白講，賭博士對潘頓頗有好感，當然希望他吉人天相，但願其健康陰霾僅虛驚一場。然而凡事兩面睇，今戰潘頓無法出賽，對馬迷而言也絕非壞事，皆因六匹早已設有後備騎師的戰駒，當中盡露搏殺玄機！

　　先講頭場「領航精神」，在港兩季未開齋，幕後恨贏毋庸置疑。而賴維銘是強哥愛將，好馬理應優先到手，但強哥之前仍把此駒交由潘頓操刀，反而賴仔淪為後備，這說明甚麼？答案一字咁淺，就是強哥想借助潘頓騎功替這匹處女馬開齋。

　　雖然最終事與願違，潘頓未能替「領航精神」執韁，但其實此駒早前於谷草一哩入Q之役，鞍上人正是賴仔，足見人馬合拍，今次交回後者操刀，隨時因禍得福，有力先拔頭籌。

　　再講第三場「勝利大將」，自季初兩捷後便無以為繼，上仗與潘頓故劍重逢，即突如其來跑得接近。今仗此駒雖然未能再夥拍潘頓上陣，但改配近期大紅人貝湯美，威力隨時有增無減。觀乎後者剛戰中三元兼捧兩盃，手風大順，隨時有望替「勝利大將」取得季內第三捷。