高普Vs哥帥 德甲更精彩

猪拉多纳

雙雄角力 延續盛世

新一季德甲周六凌晨開鑼，衞冕拜仁將與慕遜加柏踢揭幕戰。上季兩大班霸拜仁慕尼黑同多蒙特包辦歐聯決賽名額，表現令一眾西、英、意豪門心服口服，今季兩強進一步提升兵力，除繼續壟斷德甲爭霸戰外，亦銳意繼續於歐洲賽場發光發熱，延續德甲盛世！
拜仁總身價逾50億

拜仁上季成為三冠王，同時寫下逾二十個德甲歷史新紀錄，取得近乎完美成績，老帥軒歷基斯今夏功成身退，改由曾於巴塞隆拿取得豐功偉績嘅西班牙名帥哥迪奧拿領軍，拜仁於超強陣容基礎上，再豪花6,200萬歐元擴軍，撬走死敵多蒙特「金童」馬里奧葛斯，亦由巴塞簽下哥帥愛將堤亞高艾簡達拿，根據權威《轉會市場》網站估計身價，擴軍後嘅拜仁一隊27名球員合計總值已經突破50億港元，比起英超最富貴嘅曼城，仲要多出二千多萬港元，認真誇張！
多蒙特新兵卡士足

哥迪奧拿今季大把好牌在手，雖然季前熱身賽試過改變陣式同注入巴塞踢法，球員未能適應表現一般，但最近於德國盃首圈賽事佢都屈服作出微調同妥協，拜仁喺聯賽頭五輪對手都唔算強，大把時間畀哥帥執，相信佢熟習各球員特性後，拜仁好快會回復霸主本色！

多蒙特雖然失去咗馬里奧葛斯，但佢嘅原來好拍檔馬高列奧斯足以支撐大局，而且總算留住羅拔利雲度夫斯基，陣容變化唔算大，今夏亦用咗5,000萬歐元擴軍，新兵米希達利恩、奧巴美揚同柏柏斯達夫普路斯都極有卡士，就算呢批新兵仲未完全發揮作用，多蒙特已經喺較早前嘅德國超級盃以4:2殺敗拜仁，證明有料少帥高普可以克服失去「金童」問題，多蒙特仍然夠料成為拜仁爭霸大敵，整體實力甚至比上季更上一層樓。
利華史浩克仍需努力

不過，德甲雙雄壟斷情況的確嚴重，其餘球隊暫時都好難追得上，上季聯賽三、四哥利華古遜同史浩克04雖然都積極組軍同增兵，但相信都只係能夠擔任左右大局角色，德甲要有第三支足以縱橫歐洲戰場嘅球隊，恐怕今季仲未係時候。