巴素利喪攻盧多格德斯

猪拉多纳

歐聯附加賽次回合賽事，瑞士勁旅巴素利主場決戰保加利亞球隊盧多格德斯，巴素利首回合作客都贏4比2，呢班波上季喺歐霸盃單挑英超雙雄熱刺同車路士不落下風，夠料打歐聯，新季留住「埃及小王子」穆罕默德沙拿，中前場猛將如雲，攻到你暈，捧大最好！（有線62及202台周三凌晨2時45分直播）

巴素利喺上屆歐霸盃上晒身，八強火併英超實力分子熱刺兩回合踢成4比4，最終射贏十二碼進身四強，準決賽惡鬥另一倫敦球會車路士雖然輸波，但踢落虎虎生威，贏盡口碑。巴素利新季留住大部分主力，包括埃及超新星穆罕默德沙拿，佢首回合就梅開二度成為功臣，會方仲搵番阿根廷嘅馬迪亞斯迪加度回巢，配合快翼史托卡及老牌射手馬高史達拿等攻擊好手，火力好勁。

保加利亞球隊盧多格德斯喺11至12年度球季升班，首季即贏取聯賽錦標，上季成功冧莊。佢哋陣內除土炮以外，南美幫勢力都好大，淨係巴西兵都有五件，最具名氣係曾經嚟過南華落班嘅巴西前鋒柏天尼(Michel Platini Mesquita)，佢上場喺56分鐘落場，球隊由贏緊2比1變輸2比4，慘成黑腳！大軍現時形勢差，佢哋條防線喺國內係一流，出到歐洲賽只係九流，今戰焗攻恐會再被炒，捧大盤啱數！
歷基亞「細」玩星隊

另一場波蘭歷基亞主場鬥羅馬尼亞布加勒斯特星隊，星隊首回合捉到鹿唔識脫角，領先下被對手逼和1比1。歷基亞上圈淘汰挪威莫迪情況和如今同出一轍，手執一個作客入球，大可以歎慢板玩死守，捧入球細。

（有線63台周三凌晨2時45分直播）