潘頓開鑼鬥志堅

猪拉多纳

　　前日本報資料組跟大家分析開鑼日捧李廐馬有着數，今日焦點則落在騎師身上。部分騎師暑期選擇出外遊玩散心或回鄉探親，但亦有一些騎師積極操弗自己，務求在季初以最佳狀態上陣。由於騎師狀態直接影響賽果，故此，馬迷於開鑼日投X時，宜捧一些常於以往同日有馬贏的騎師為妙。本報資料組

　　翻查近三季開鑼日的頭馬紀錄，不計歐道樂、彭利力及田泰安三位新馬會騎師，可於今季開鑼日上陣的騎師中，除潘頓曾於此日贏出兩匹頭馬及以上外，其餘騎師最多得一W，有些更是空手而回，由此可見，開鑼日連場追捧潘頓的坐騎，隨時有金執。根據紀錄顯示，潘頓除了11/12年馬季的開鑼日冇馬贏外，10/11年馬季及12/13年馬季都中三元（見右下表），認真威到震，今季開鑼日他隨時又贏幾場，捉路要吼實。

　　上季潘頓於開鑼日共有八匹坐騎，最終取得三冠一亞，當中三匹頭馬的獨贏賠率有冷有熱，熱的有5倍的「紅山茶」，冷的則有11倍贏出特首盃的「富高勝」及12倍的「太陽海岸」，可見騎者冷熱皆拼。再者，騎者今季一早於八月十九日復操之餘，又連續多日見他於晨課時跟幾位練者（如葉楚航、文家良等）密斟，可見他揚言今屆要繼續挑戰韋達冠軍騎師的地位，絕非空口講白話，且看潘頓今季開鑼日能否再中三元，攞個頭彩。

　　楊明綸連續三季有W

　　除了潘頓，楊明綸亦是開鑼日旺人，近三季皆有頭馬交出，上季他此日共有十匹坐騎，結果雖得冠季殿各一，但三駒賠率至少都有15倍，相當好分，既然他常於開鑼日搏冷門，今季宜加留意。