熱刺欠霸氣卡城受讓有計

猪拉多纳

卡迪夫城主場威力唔係人咁品，受讓好筍！另一支倫敦勁旅熱刺將北上威爾斯作客卡迪夫城，主隊早前3比2殺敗曼城有辦你睇，今仗仲有比拿美強勢復出信心爆棚，熱刺人多未必好辦事，作客讓波盞搞，捧下盤！　　　　　　　　

（now 622周日晚11時直播）
比拿美復出領軍

睇牌面、球隊評級，熱刺星光熠熠挑戰歐聯席位，卡迪夫城只係一支升班球隊，客軍要讓半一都唔過分。不過卡城主場戰鬥力強，面對億萬大軍曼城，班波都打得有板有眼，無論走位、傳送、埋門都好有水準，鬥熱刺絕對有得打。球隊精神領袖比拿美，以及正選門神大衞馬素爾均能復出，加埋弗爆中場韋定咸助陣，配合現場墟冚主場氣勢，形勢毫不輸蝕。
蘇爾達杜未上力

熱刺今夏豪花過億鎊買人，逐個秤當然犀利，但依家唔係打機，幾勁嘅球員都要時間夾，熱刺明顯仲未執掂，現階段難以打出最佳水準。睇番佢哋英超開咧戰，作客僅勝水晶宮1球，整體演出只係麻麻；之後無論鬥阿仙奴，抑或對諾域治都踢唔出霸氣。熱刺有丹尼路斯、迪比利有傷上陣成疑，正印前鋒蘇爾達杜今季淨係入過12碼，擺明未上力，作客實在讓唔起，揀下盤更明智。