暴發戶對決！PSG神箭「大」顯身手

猪拉多纳

法甲今晚上演暴發戶「大」戰，巴黎聖日耳門喺主場對摩納哥，追2.1倍入球大穩陣。事關兩隊各有超級射手孭飛，賽前仲有消息話，聖日耳門打算以世界第2最高人工、僅次於C朗嘅1,500萬歐元年薪同伊巴謙莫域續約到2016年，有人工加，伊巴謙又點會唔搏命呀？

（開賽時間：周一凌晨3:00）
1.5億年薪誘伊巴謙續約

經過開季4場比賽，聖日耳門新簽嘅卡雲尼已經入咗2球，包括日前喺作客以4:1大勝奧林比亞高斯嘅歐聯分組賽先開紀錄，反而作為隊中頭號球星嘅伊巴謙莫域，到家陣都仲係入得1粒咋。好喇，可能會方認為「錢」 先至係呢位瑞典巨星嘅主要動力，所以聖日耳門已經準備好一份除稅後有成1,500萬歐元（約1.5億港元）年薪嘅豐厚新約，「利誘」伊巴謙賣命，咁大疊錢擺喺度，唔通伊巴謙仲會揸流攤咩！

對家摩納哥開季後喺聯賽連續打沉波爾多同馬賽，新加盟嘅法卡奧連續2場有士哥，證明冇入錯貨。仲有呀，摩納哥教練雲尼亞里賽前無啦啦認低威，話現階段嘅聖日耳門比佢哋更勁，咁做無非都係想幫摩納哥眾星減壓、放低包袱盡情喪攻啫，既然兩軍都有超級射手照住，計吓條數，只要伊巴謙莫域、卡雲尼同法卡奧每人入1粒，咪夠開入球大囉！