大眼仔否認曾與曼聯簽協議

猪拉多纳

榜首阿仙奴近期氣勢如虹，「大眼仔」奧斯爾極速融入球隊，踢咗兩場英超已有3個助攻。雲格大破慳囊，用咗5000萬歐元（約5.2億港元）買佢返嚟，絕對係物有所值呀﹗但日前有德國媒體大爆奧斯爾喺轉會阿仙奴之前曾經同曼聯達成轉會協議，上面仲有奧斯爾父親嘅簽名添，佢隨即否認其事，話會搵律師處理。
阿仙奴夠殺史雲斯

阿仙奴多咗「大眼仔」之後脫胎換骨，除咗上場聯賽盃對西布朗留力和咗之外，英超加歐聯賽事已錄得7連勝，亦係今季英超入面，唯一一支場場都有入波嘅球隊，所以周日凌晨作客史雲斯，即使主力禾確特同辛迪卡索拉缺陣，阿仙奴仍有力乘勝追擊，作客小讓平半吼上盤。