哥帥學精拜仁返晒嚟

猪拉多纳

德甲拜仁慕尼黑主場對禾夫斯堡，班霸拜仁今季由新帥哥迪奧拿領軍，季初演出未盡人意，不過近期佢明顯學精咗，對自己的巴塞式踢法冇咁堅持，給予球員更大自由度，而且德國傳媒仲爆料，話佢近期不斷同前主帥軒歷基斯聯絡，一齊研究教好拜仁嘅最佳方法，球隊近期表現的確回復霸氣，三線作戰連場大捷，啱啱德國盃半力一樣輕取漢諾威，今晚仲有「金童」馬里奧葛斯傷愈候命，面對近況同作客都麻麻嘅禾夫斯堡，客軍仲有主力攻擊手維爾連亞喺德國盃受重創要長抖，1.5倍「讓球主勝」係過關重心。
賀芬咸為波利斯胡錫域奮戰

同時舉行嘅仲有賀芬咸主場對史浩克04，今日係賀芬咸年輕中場波利斯胡錫斯嚴重車禍重傷嘅一周年，雖然佢傷勢一直有進展，但仍然未可以重返球場睇波，只能在家中睇直播。會方決定喺場上同佢搞紀念活動，主場球迷都會穿上胡錫域T恤，賽前一齊高唱《You`ll never walk alone》，隊長安達斯碧克更聲稱全隊都會為佢奮戰，遇上人腳唔齊兼有歐聯後顧嘅史浩克，平手盤撐主隊。