國米搶W保馬沙利飯碗

猪拉多纳

做人最緊要爭氣，好似國際米蘭教練馬沙利咁，一路有傳球會「準揸弗人」托希爾唔太睇佢台戲，偏偏馬沙利就教到隊波曉飛，開季錄4勝1和不敗佳績，夠晒本錢做爭標分子。今晚佢哋會同陣容不整嘅卡利亞里交手，照計技高一籌嘅國米可以乘勇添食，捧1.92倍客W。

（開賽時間：周日晚9:00）

據《國米新聞網》所講，會長莫拉堤上周已經將70%國米股權賣畀托希爾，聽日就會正式宣布呢位印尼富豪入主董事會，呢位「名牌奴隸」未坐正已經放風話想搵前拜仁主帥軒歷基斯出山，暗示只會畀1年時間現任教頭馬沙利證明實力。好在馬帥爭氣，新季除咗同祖雲達斯打和之外，其餘4場波全部贏晒，周中亦都以2:1打破費倫天拿嘅不敗身，就連副隊長甘比亞素都話陣營士氣史無前例咁好，撐馬沙利撐到出晒面。
卡利亞里主場未用得

國米新季順到爆，反觀卡利亞里就濕滯多多，佢哋個聖艾利亞球場已經完成翻新工程，弊在幾個安保檢查都「肥佬」，重開之日又要押後到下個月中，今場波焗住要移師位於泰利斯迪嘅樂高球場舉行，變相冇咗主場之利！新季意甲只係贏過1場嘅佢哋，本身已經唔係國米嗰皮，今晚仲要有一對中場主將艾卡度同高素倦勤，憑咩同贏到開巷嘅國米鍊先？