科蘭 達美奧冇料到 國體會啞火益高士路

猪拉多纳

國際體育會聽朝回師巴甲主場迎戰高士路，啱啱喺巴西盃8強首回合激戰完嘅國體會，體力輸蝕唔在講，以李安度達美奧、科蘭為首嘅鋒線最近仲集體啞火，中後場幾名核心球員又話要「踎監」冇得落場，今場邊有本錢砌低聯賽一哥先，吼高士路1.9倍平手盤，坐和望贏！

（開賽時間：周一清晨5:30）
國體會3主力坐波監

國體會日前喺巴西盃逼和帕拉尼恩斯1:1，一對箭頭科蘭、李安度達美奧都冇貨交，隨後換入嘅伊拿斯奧史高高及卡奧簡尼度又冇料到，4大前鋒最近6場顆粒無收不特止，李安度達美奧更陷入連續10場、長達838分鐘嘅入球荒，鋒力弱過藥煲。再者，防線定海神針恩迪奧上輪聯賽領紅被逐，中場雙核迪阿歷辛度及艾頓列比路亦黃牌夠數，3人今場要齊齊停賽，影響極大。

高士路雖然都有中場孖寶盧卡斯施華及列卡度高拉特坐波監，不過近況大勇嘅巴迪斯達及尼頓費拉拿足以填補空缺之餘，上輪鬥哥連泰斯受傷退下火線嘅波捷斯，賽後證實大腿傷勢無礙，今仗夥拍傷愈復出嘅盧恩盧沙喺前線搵食，前線齊腳，高士路平手盤梗係抵撐啦！