大摩預埋歐道樂 強勁攻勢一觸即發

猪拉多纳

今季初來埗到嘅三位公司騎師際遇各異，講順利就梗係首推田泰安啦！其次彭利力得1W只算一般，歐道樂就最棘手，跑到依家居然仲未開齋，人哋星洲嗰邊莫雷拉已經執緊行李準備過來香港搶灘，如果歐道樂喺佢殺到之前仲唔贏番一兩場穩住陣腳，形勢就真係唔太樂觀。
       
兵工闖
兵工闖上季尾試準

計吓條數，其實歐道樂又唔係無轉機嘅，話晒都仲有大馬房支持，淨計今期大摩就有「兵工闖」、「一寶」同「勝利之星」三件揀手貨益佢，尤其前駒上季尾兩場有連番試準鏡頭，呢位歐洲騎師今日要破齋缽亦唔係無本錢。講起大摩，季前已經講明9月份會歎慢版，結果佢三個禮拜加埋真係出得9隻馬咁大把，證明果然無講大話。
       
設計圖片

不過唔覺唔覺10月份話咁快又到嘞！上季國慶日佢連場搶攻，最終豪奪2冠2亞1季，睇今年咁嘅強勁陣容，隨時再度大舉出擊。用人方面，其實自從前主帥白德民退隱之後，大摩同好多騎師都保持良好合作，不過佢似乎對英愛騎師有份情意結，就好似郭能同祁義理咁，整體嚟講聲勢唔算好強，但係最終都得到大摩垂青，成績都有交代，希望歐道樂唔會成為例外嘅一個啦！