冇巴利仔皇馬夠炒小蝙蝠

猪拉多纳

威爾斯領隊高文大吐苦水，話加里夫巴利為逼熱刺畀佢跳槽，今夏冇乜點練波比賽，但上「艦」後狂催谷一日兩練兼即刻落場，唔傷就假，一個月內傷咗三次。
迪馬利亞C朗弗爆

雖然「大聖爺」入選下周世盃外大軍名單，但高文講到明會畀佢放假抖抖，仲話英超節奏比西甲更快，皇馬教頭安察洛堤懶醒以為巴利仔可極速適應西甲，太心急推佢上戰場，揚言今次唔會係呢位威爾斯飛翼本季最後一次受傷，擺明寸爆「肥安」係用殘巴利仔嘅罪魁禍首。

巴利仔預計要抖多兩周先可復出，好彩「銀河艦隊」勝在球星多，代替佢嘅「天使之翼」迪馬利亞弗到爆燈，王牌C朗於周中歐聯對哥本哈根場波，在囝囝及索爆女友伊蓮娜捧場下梅開二度，用士哥為自己歐洲賽百戰助興之餘，今季頭9仗轟入11粒，創下職業生涯最佳開局，可謂愛情事業兩得意。加上皇馬上輪打吡戰輸畀馬體會，搞到冇晒飛士，今晚作客利雲特勢必大開殺戒，當佢哋係沙包咁出氣，「小蝙蝠」係西甲最識揀波踢球隊，近期頻頻搶到分食到飽晒，無謂阻人發達，直取「讓球客勝」。