克魯受讓咪落疊

猪拉多纳

傷王牌射手無力爭盃仔

是日清一色玩英格蘭聯賽錦標，上屆盟主克魯喺第二圈作客面對英乙球隊費列活特，克魯王牌射手馬特斯波格巴係祖雲達斯法國中場保羅普巴大佬，可惜佢季前受傷有排抖，班波即時衰到貼地，依家邊有心情爭盃吖，今場受讓都信唔過，捧主Ｗ！

（周三凌晨2時45分開賽）

前曼聯青訓產品保羅普巴做埋法國大國腳，係祖記打得有聲有色，佢大佬馬特斯波格巴選擇代表畿內亞，呢個大舊射手喺英甲撈得幾掂，上季成為克魯首席射手，仲協助球隊取得英錦標冠軍。不過，馬特斯波格巴季前熱身賽太落力整傷韌帶要長抖，克魯大受打擊，開季聯賽十戰僅得六分，近四戰一和三負，加埋入得一粒，非常唔掂。英錦標自83至84季度成立至今從未有球隊冧莊，克魯都係劫數難逃，對住英乙仔都有得受讓，一睇就知唔掂啦！
彼德堡卡維尼串Ｗ

同日英甲球隊彼德堡主場迎戰同級球隊賓福特，彼德堡係典型「英冠尾、英甲頭」球隊，身處英冠唔夠揪，落到英甲就惡到暈，佢哋新季喺聯賽順風順水，仲試過喺聯賽盃以6比0狂數英冠球隊雷丁，走勢凌厲，今場可秤先。至於英甲大軍卡維尼就於主場鬥英乙球隊紐波特郡，紐波特郡作客唔叻，越級挑戰惡唔出樣，熱捧主Ｗ！