甘巴爾領阿德萊德聯再顯光輝

猪拉多纳

澳職真係愈嚟愈有親切感喇，兩位曾經喺香港教波嘅摩力克同甘巴爾，今日會先後首度領軍出戰！摩力克教香港隊雖然不歡而散，但返到澳職做番地頭龍，應該唔會再失威，而甘巴爾就大家一定熟悉，估唔到阿德萊德聯咁識貨喺傑志度搵佢返去，而我哋個拍檔立民原來同甘巴爾幾熟，唔知之後睇直播時有無獨家消息呢？

據講當地球迷都好歡迎甘巴爾呢位新教頭，佢仲帶埋兩位以前喺巴塞青年軍嘅部下沙治奧施里奧同伊沙亞斯加盟，呢兩位「秘密武器」隨時彈出，球迷要多加留意。甘巴爾就話好滿意球隊喺熱身賽嘅表現，事實上佢哋一路以來踢嘅9場熱身賽贏咗7場，睇嚟阿聯都好快適應甘巴爾喜好嘅短傳踢法，妹頭今日都力撐佢哋今日主場對柏斯光輝贏波。
珀斯光輝作客舟車勞頓

珀斯光輝作客東部球隊舟車勞頓，所以上季作客戰績都好差，只曾贏過3場。陣中後防老大哥希法蘭又離隊他投西悉尼流浪者。最大鑊原本搵米列斯域加盟救亡，點知喺一星期前因為同教練團口角，突然宣布離隊，光輝真係被打亂晒部署，王牌射手史美斯又因傷缺陣，帶住咁嘅軍心同後防問題作客，又點可以睇好呢？

（有線64台周日下午2時直播）