聖人金鐘罩 細頂紅魔

猪拉多纳

曼聯上輪英超憑超新星贊奴沙梅開二度贏波止跌，今輪主場迎擊修咸頓，全球「魔粉」熱切期待佢哋延續升勢。不過，「聖人」今季練成金鐘罩神功，現為英超防守王，已於聯賽保持392分鐘不失，「紅魔鬼」頂盡小勝，博細！
曼聯未復霸氣

曼聯開季於英超脫腳，上輪作客新特蘭再次陷入苦戰，全靠小將贊奴沙上身入兩粒先成功反勝，未復霸氣。「紅魔鬼」續有中場費查休戰，中堅里奧費迪南、右閘拉菲爾達施華及中場湯卡華利同樣有傷上陣成疑，兩大射手朗尼及尹佩斯冇事冇幹踢得，中前場基本上人齊，但中場創造力不足仍屬最大問題，唔易攻破對手大門。
修咸頓最守得

修咸頓新季增兵後愈踢愈穩，九月尾作客砌低利物浦一役令人印象深刻，呢班波依家後面守得穩，一對中堅洛夫雲及荷西方迪非常可靠，兩閘尼達利基尼及勞基梳爾活力十足，門神保路錫雖有傷在身，但預期可披甲。「聖人」聯賽七戰失兩球，數字係全英超最低，今次專心做好防務，有力頂住對手進襲，細盤博得過！